หน้า 1 จากทั้งหมด 2

ฝึกเขียนค่าว (บทกวีล้านนา)..โดย น้ำฟ้า

โพสต์เมื่อ: ศุกร์ 11 ต.ค. 2013 6:07 pm
โดย น้ำฟ้า
(ลูกจาวนา)

กลิ่นโคลนสาบควาย ติดก๋ายยันเฒ่า เพราะเนื้อแต๊เฮา คือลูกจาวนา

เป๋นเกียรติเป๋นศรี ตี้ได้เกิดมา บ้านนอกคอกนา ป่าเขา

แม้ในวันนี้ ไก๋ภูมิลำเนา บ่ใจ้มัวเมา แสงสี

บ่เมินจะปิ๊ก คืนหาคนดี เพื่อนพ้องน้องปี้ ตี้พรากจากมา

1376565_630214523697254_94140560_n.jpg
1376565_630214523697254_94140560_n.jpg (39.97 KiB) เปิดดู 20267 ครั้ง

Re: ค่าว (บทกวีล้านนา)

โพสต์เมื่อ: เสาร์ 12 ต.ค. 2013 9:12 am
โดย น้ำฟ้า
(เกิบพระ)

1610046_1482627785285492_4278034413245198119_n.jpg
1610046_1482627785285492_4278034413245198119_n.jpg (11.86 KiB) เปิดดู 19727 ครั้ง


1374236_4907056574058_1316186333_n.jpg
1374236_4907056574058_1316186333_n.jpg (36.51 KiB) เปิดดู 20264 ครั้ง


งานบุญงานปอย ต้องคอยห่วงเกิบ ปิ๊กมาหงายเงิบ เกิบพระหายไป

ถอดไว้ตั๊ดนี่ มันหายไปไหน ตี้ตี๋นคันได แล้วไยโล่งลึ้ง

เกิบดำขี้หมี้ พระนึกบ่ถึง ไผจะสึ่งตึง ลักเกิบพระได้

ขอวอนญาติโยม ได้โปรดหันใจ๋ ไผเอาเกิบไป คืนไว้ตี้เก่า

Re: ค่าว (บทกวีล้านนา)

โพสต์เมื่อ: อาทิตย์ 27 ต.ค. 2013 8:11 am
โดย ภาษาสยาม
...กฐินผ้าป่า..ยกมากั๊งกั๊ง..เหล้าเบียร์กี่ลัง..ยอกหมดเสี้ยงเจ้น
โห่ฮ้องเฮฮา..บ่ฮู้ฮ้อนเย็น..ทั้งทั้งตี้เป๋น..งานบุญงานตาน
พ่องเมาจ๋นปิ้น..พ่องกิ๋นเมาแอ๋..พ่องกิ๋นยันแก่..กิ๋นล้างกิ๋นผลาญ
พ่องเป๋นแม่ญิง...เมากลิ้งสำราญ..อินดูเต๊อะท่าน..มันเสื่อมศรัทธา
ก๋ายเป๋นงานบาป..โปรดทราบเสียหนา..บุญตี้ได้มา..ลบล้างเหียหั้น
ตุ๊ปากบ่ออก..บอกเขาเหมือนกั๋น..เขาบอกจั้งมัน..กิ๋นกั๋นกู้ตี้
เหมือนมาแอบอ้าง..ตางป๋าเวณี..แต๊เป๋นเผดผี..ทำลายศาสนา
งานกิ๋นงานตาน..ยะด้วยศรัทธา..ใจ้ว่าเอาหน้า..เมื่อใด
ใจ๊สมองกึ๊ด..มันดีตี้ไหน..จ้วยบอกต่อไป..อย่าได้ยะเลย

78999.jpg
78999.jpg (304.04 KiB) เปิดดู 20232 ครั้ง

Re: ค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 03 พ.ย. 2013 5:36 pm
โดย น้ำฟ้า
_DSC5872-1.jpg
_DSC5872-1.jpg (99.77 KiB) เปิดดู 20221 ครั้ง


ถึงมีแฟนแล้ว อ้ายก็จะถาม ลักเมาคนงาม จะว่าก่เจ้า

อ้ายมันคนตุ๊ก อ้ายมันบ่เลา ได้แค่ฮักเมา ปอแล้ว

อ้ายตึงสุขใจ๋ ยามแม่ดอกแก้ว เตียวก๋ายมาแผว แถวนี้

อินดูอ้ายเต๊อะ คนงามสาวจี๋ ส่งยิ้มมาที บ่ดีใจฮ้าย

รอแฟนน้องละ อ้ายจะขวนขวาย ขายงัวขายควาย เอาไปขอเจ้า

ขอเยียวยาใจ๋ หื้อน้องลืมเขา ปลูกฮักสองเฮา ตราบดินชั่วฟ้า

Re: ค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 03 พ.ย. 2013 5:37 pm
โดย น้ำฟ้า
1385967_530321940378945_1827421944_n.jpg
1385967_530321940378945_1827421944_n.jpg (28.27 KiB) เปิดดู 20221 ครั้ง


ลมเจยวอยวอย ป๋ายดอยเจื๋อเหมย แม่ศรีบานเชย น้องเกยอยู่บ้าน

จัดแจ๋งแต่งดา ข้าวป๋าอาหาร หน้าจื้นต๋าบาน ฮักหวานอู้ถ้อง

ยามแลงวันนี้ อ้ายหนานหม่นหมอง ทรามเชยนวลน้อง ไปไก๋จากบ้าน

เวลานาที บ่มีเปรียบป๋าน หยังมาเมินนาน หยั่งอี้

น้ำต๋าอ้ายไหล อาลัยสาวจี๋ รอวันพูกนี้ เจ้าย้อนมาบ้าน

เสียงต๊กโตฮ้อง นึกว่าต๋าหวาน นกฮ้องกั๋งวาน นึกว่าตั๋วเจ้า

บ่หันคนดี อ้ายนี้เงียบเหงา หัวใจ๋หม่นเศร้า อกสะต๊อน

เข้าปู๋สะลี เอามือลูบหมอน กึ๊ดถึงบังอร เมียอ้าย

ธุระปะปั๋ง อะหยังมาหลาย คืนเดียวบ่ดาย ห่างร้าง

หัวใจ๋อ้ายนี้ มันจ้างขี้ขาง ห่วงหานวลนาง บ่จ๋างจากเจ้า

วันพูกปะกั๋น จะบ่หื้อเหงา กอดเจยน้องเหน้า แนบอกปี้อ้าย

ขอดาวป๋ายฟ้า บอกแม่บัวสาย ว่าหนานสมหมาย รออี่นายอยู่บ้าน

Re: ค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 10 พ.ย. 2013 8:05 am
โดย น้ำฟ้า
IMG_0392.jpg
IMG_0392.jpg (253.59 KiB) เปิดดู 20196 ครั้ง


กำค่าวสอนหญิง

เกิดในล้านนา มีก้าคนขอย ฮู้ก่ออี่หน้อย เปิ้นขอยอะหยัง
ขอยป๋าเวณี อันมีมนต์ขลัง ฮีตฮอยปูมหลัง เก่ากี้
บ้านเมืองแสนงาม จารีตอันดี สืบสานนานปี๋ บ่สูญ
แม่ญิงป้อจาย งดงามจำรูญ จ้วยเหลือเกื้อกูล เมืองปุ๊ด
สาวงามหน้าใส ใจ๋บริสุทธิ์ เนื้อตั๋วผ่องผุด โสภา
นุ่งซิ่นเสื้อฝ้าย งามก๋ายวาจ๋า งามจริตกิริยา ผ่องแผ้ว
มาถึงวันนี้ เป๋นหยังไปแล้ว อกเอ๋ยอี่แก้ว อี่คำ
สาวหน้อยบ้านเฮา หยังมาสะหลำ ลืมถ้อยลืมกำ สั่งไว้
แต่งเนื้อแต่งตั๋ว หันถึงไหนไหน กั๋วหาผัวบ่ได้ กาน้อง
ผ่อไปตางใด ใจ๋มันหม่นหมอง เขาลืมครรลอง เหียละ
เปิดแก่นต๋าผ่อ ก่อเป๋นดีจ๊ะ หูยโคะผ่อฮะ หมู่เฮา
เตี่ยวสั้นหันแง่ม ขาเต้าเลาเสา ส่วนเสื้อน้องเหน้า แอวลอย
ตี้จ่มมานี่ บ่ใจ้ว่าขอย กึ๊ดเต๊อะอี่หน้อย อี่นาย
สูยะจะอี้ มันตึงเสียหาย ศักดิ์ศรีวอดวาย หมดเสี้ยง
ป้อแม่เปิ้นสอน มันง้างปากเถียง ลืมตี้เปิ้นเลี้ยง ดูมา
ฮ่ำเฮียนบ่สน กุ้มก้าแต่งหน้า แฮ่นไปแฮ่นมา หน้าเซอะ
กลับตั๋วกลับใจ๋ ลองกึ๊ดผ่อเต๊อะ ใค่เป๋นขี้เฮอะ กาว่าเพชรพลอย
เอื้องแซะดอกฟ้า สูงค่าสุดสอย ยังมีคนคอย ฮ่ำหา
ป๋าเวณีเฮา สืบทอดกั๋นมา สอนหื้อฮักค่า แม่ญิง
คนสมัยใหม่ อะหยังเข้าสิง แต่งหน้าอย่างลิง หลอกเจ้า
ควรตรองดูใหม่ แป๋งใจ๋สูเขา บ่ดีหูเบา ต๋ามน้ำ
ฮักษาเนื้อตั๋ว หื้อคนเก๋งขาม บ่ดีหื้องาม ก้าหน้า
งามตั๋วงามใจ๋ งามภูมิปั๋ญญา จ้วยกั๋นฮักษา สืบไว้
ทำดีวันนี้ บ่ใจ้เปื้อไผ เป๋นมรดกไว้ หื้อลูกหลานเฮา

Re: ค่าว (บทกวีล้านนา)..โดย น้ำฟ้า

โพสต์เมื่อ: เสาร์ 16 พ.ย. 2013 12:23 pm
โดย น้ำฟ้า
ยี่เป็งล้านนา

show_image_NpAdvSinglePhoto.jpg
show_image_NpAdvSinglePhoto.jpg (30.98 KiB) เปิดดู 20170 ครั้ง


ป๋าเวณีเก่า ของเฮาจาวเหนือ งามล้ำงามเหลือ ยี่เป็งล้านนา
ม่วนงันสันเล้า ผางปะตี๊ปปู่จา ลอยโกมขึ้นฟ้า ฮ่วมลอยกระทง
กลิ่นเตียนกลิ่นธูป จวนหื้อใหลหลง นั่งเคียงอนงค์ ฮิมน้ำ
ลมหนาวเจยมา ปาอ้ายวาบหวาม ดวงเดือนแสนงาม บ่เปียงหน้าเจ้า

คนงามปี้อ้าย น้องคงจะหนาว ผ่อเต๊อะสั่นเทา อย่างอั้น
ขดมาตางเพ้ ไผตึงบ่หัน ไออุ่นอ้ายนั้น เปียงปอน้องเหน้า
บนฟ้ามีดาว ใจ๋อ้ายมีเจ้า อยู่ฮ่วมใต้เงา เป็งนี้
กระทงแก่นหน้อย ลอยออกจากตี้ แต่ใจ๋อ้ายนี้ จอดตี้อี่นาง

Re: ค่าว (บทกวีล้านนา)..โดย น้ำฟ้า

โพสต์เมื่อ: เสาร์ 16 พ.ย. 2013 12:25 pm
โดย น้ำฟ้า
คนเอ็น

post-1907-1286474987.jpg
post-1907-1286474987.jpg (249.1 KiB) เปิดดู 20170 ครั้ง


...เป๋นดีใค่หัว อี่บัวไอ่นวย สองคนถูกหวย สิบล้าน
เมียเลิกขายฮ้า ผัวเลิกแป๋งบ้าน ปากั๋นเปิดร้าน ไฮโซ
ผัวแป๋งหนวดกิ ทำตั๋วยโส อย่างกับใหญ่โต เหียล้ำ
เมียเชิดป๋ายฟ้า แต่งหน้างามขำ ถึงตั๋วจะดำ ปากแดงปะหลึ้ง
มันมีลูกหน้อย จื้อเอื้องกับผึ้ง เปลี่ยนเป๋นน้ำหนึ่ง กับน้องแตงกวา
แต่ก่อนอู้เมียง หมดเสี้ยงผญา บ่กองรวยมา มันอาย
อู้ไทยหมดบ้าน เพื่อนผองญาติสาย ปู่ย่าต๋ายาย เปิ้นเตือนบ่ฟัง
กึ๊ดตรองพ่องเต๊อะ สำนึกความหลัง ก่อนจะมีตังค์ สูเป๋นจะใด
ป้อแม่เกิดมา เป๋นคนตี้ไหน เปิ้นอู้กำไทย กาว่าอู้เมียง
สายเลือดล้านนา จะไปมาเถียง กาว่ามันเสี้ยง สูญไป
โอ้ก๋าลเวลา ดังสายน้ำไหล แป๋เปลี่ยนจิตใจ๋ ของคน
เกิดเป๋นคนเมียง บ่ดีไปสน ยากดีมีจ๋น ก็สายเลือดเดิม
ความกตัญญู นั้นจ้วยส่งเสริม บารมีจ้วยเติม แต่งสร้าง
ฮักภาษาถิ่น หื้อเป๋นแบบอย่าง จ้วยกั๋นแผ้วถาง ศรัทธา
จารีตแบบเก่า จ้วยกั๋นฮักษา ปลูกฝังพัฒนา เต๊อะเจ้า
ภาษาป้อแม่ บ่ดีอายเขา เฮาอู้ของเฮา จั้งเขาคนมอง

Re: ค่าว (บทกวีล้านนา)..โดย น้ำฟ้า

โพสต์เมื่อ: เสาร์ 23 พ.ย. 2013 7:36 am
โดย Namfar
เลือดล้านนานี้..ล้วนสีเดียวกั๋น

art4.jpg
art4.jpg (272 KiB) เปิดดู 20151 ครั้ง


เกิดในล้านนา เมืองฟ้าบนดิน เฮาอยู่เฮากิ๋น เรียบง่าย
ป้อเจ้าพญา มีราโชบาย หื้อเฮาตังหลาย ฮักสามัคคี
สายเลือดหมู่เฮา เข้มข้นเต๋มตี้ แบ่งแยกบ่มี สืบเจ้นเมินนาน
เสียงซึงเสียงซอ สะล้ออ่อนหวาน เย็นใจ๋จื้นบาน จ้วยเหลือเกื้อกูล
สานต่อความฮัก บ่หื้อสาบสูญ ก่อเป๋นเก๊ามูล วัฒนธรรม
มาในวันนี้ เหมือนเฮาสะหลำ ลืมหลงถ้อยกำ จิตใจ๋แคบลง
ผ่าแล่งแบ่งสี มัวเมาลุ่มหลง ต่อโยงเผ่าพงศ์ หลายปี๋เมินมา
การเมืองก๋ารแหมะ ก้ายแต๊ะก้ายว่า ด่าทอเข่นฆ่า เมตต๋าบ่มี
ปากั๋นไปต๋าย ก๋ายเป๋นเผดผี คนตี้ได้ดี มีก้าคนใน
บนแผ่นดินนี้ บ่ว่าเป๋นไผ ก็เป๋นเจื๊อไข ล้านนา
จิตใจ๋คนนั้น บังคับได้ก๋า ความเจื้อศรัทธา ห้ามกั๋นบ่ได้
แตกสามัคคี มันดีตี้ไหน เฮาก้าวผิดไป กี่ครั้ง
แผ่นดินล้านนา เกยมีพลัง ยังพลาดยังพลั้ง ถูกเปิ้นย่ำยี
เสียแก่เมืองม่าน นานสองร้อยปี๋ จวบจนวันนี้ บ่เหลือสิ่งใด
ถ้าบ่ฮักกั๋น แล้วจะฮักไผ ต้อมหอมกั๋นไว้ แป๋งใจ๋ยาวยาว

น้ำฟ้า..

“จะไปหื้อทัศคติ ความแตกต่าง มาแยกห่างหมู่เฮา”

Re: ค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 24 พ.ย. 2013 8:05 am
โดย Namfar
ถนนต้นยาง (อ.สารภี จ.เชียงใหม่)

6_45_1263115326.jpg
6_45_1263115326.jpg (197.61 KiB) เปิดดู 20148 ครั้ง


ถนนต้นยาง หนตางร่มรื่น ผ่อแล้วสดชื่น งามต๋า
เมินนับร้อยปี๋ ตี้ปลูกมันมา สมัยรอห้า แล้วเจ้า
แรกสองปันต้น ปอเมินนานเข้า ก็เหลือแค่เก้า ร้อยป๋าย
ลองกึ๊ดผ่อเต๊อะ คงน่าเสียดาย ถ้ามันจะต๋าย หมดเสี้ยง
ปลูกเพิ่มดีก่อ จ ะขอซาวเสียง เอกลักษณ์ของเวียง หื้อคงต่อไป
ตราบลูกตราบหลาน วันผ่านไปไก๋ หละปูนเจียงใหม่ ยังเหลือต้นยาง
อุบัติเหตุ เภทภัยต่างต่าง ควรมีแบบอย่าง แก้ไข
ถนนสายนี้ เฮาฮักษาไว้ กู้เวียงเจียงใหม่ จะได้ก่อเจ้า

Re: ค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 19 ม.ค. 2014 4:34 pm
โดย Namfar
index.jpg
index.jpg (195.96 KiB) เปิดดู 18493 ครั้ง


ลมหนาวสะท้อน สีออนป่าหนา ไปอยู่ไหนกา ปิ๊กมาเต๊อะเจ้า
ตั๋วข้าบ่สม ใคร่ห่มใคร่เฝ้า อ้ายคนบ่เลา น้องละ
แม้นข้าวเต๋มหลอง เงินทองสัพพะ เจ้ายังมาละ หนีตาง
ดอกออนหยั่นย้อย ซ้อยล้อยสีจ๋าง อ้ายหนาวนอนคราง ขุนวางที่หั้น
(ก้องเกียรติ มหาอินทร์)

ลมหนาวสะท้าน เสียงหวานกล่อมขวัญ กึ๊ดหาคืนวัน ปี้จั๊นแนบข้าง
ตั๋วน้องบ่สม ระทมห่างร้าง อ้ายมาเมินหมาง จ๋างฮัก
แม้นเป๋นเศรษฐี เงินมีพร้อมพรัก อ้ายคงแน่นหนัก กว่านี้
ดอกออนกลีบไหว ปั๊ดไกว๋สี้หลี้ รออ้ายคนดี ตี้นี่ขุนวาง
(น้ำฟ้า)

Re: ค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 23 ก.พ. 2014 9:27 am
โดย ภาษาสยาม
‘หมายังต้องเห่า ไก่ยังต้องขัน เหมือนหมู่เฮานั้น ต้องอู้เมืองได้
ป้อแม่เป๋นเมือง เลี้ยงลูกเป๋นไทย ผีต๋ายตี้ไหน สอนสูเขามา
มันเสียจ้าดเกิด กึ๊ดเถิดขวัญต๋า เป๋นคนล้านนา บ่ใจ้น่าอาย
เปลี่ยนกำกึ๊ดใหม่ ก่อนจะสูญหาย ก่อนจะวอดวาย สิ้นสายเผ่าพงศ์’

splanna.jpg
splanna.jpg (202.54 KiB) เปิดดู 18433 ครั้ง