หน้า 2 จากทั้งหมด 2

Re: ฝึกเขียนค่าว (บทกวีล้านนา)..โดย น้ำฟ้า

โพสต์เมื่อ: พฤหัสฯ. 29 ต.ค. 2015 3:30 pm
โดย ภาษาสยาม
ครูบาอาจ๋ารย์ เมินนานมาแล้ว เพิ่นเป๋นดวงแก้ว พระศาสนา

คนเมืองบ่าเดี่ยว แต่งตั้งครูบา โดยบ่หันค่า ป๋าเวณีเดิม

ตุ๊หนุ่มบวชใหม่ หัวใจ๋เห่อเหิม ปากั๋นแต่งเติม ลาภยศ

อันคุณความดี ตี้มีปร๋ากฎ ก็ยังบ่ผด ยังบ่นักปอ

พระใหม่เทศน์เก่ง ก็เฮ่งแต๊หนอ จะใดบ่รอ ถ้าผ่อถ้ากอย

ครูบาบ่าเก่า ค่าสูงสุดสอย เปิ้นบวชแต่หน้อย ยันเป๋นตุ๊เฒ่า

หมู่มวลลูกศิษย์ กึ๊ดผิดสูเขา บ่ดีมัวเมา เอาก้าขายพระ

858585.jpg
858585.jpg (185.73 KiB) เปิดดู 7137 ครั้ง


หยังตี้บ่เหมาะ สูจะไปยะ คนเฒ่าเปิ้นต๊ะ เตือนไว้

สะเบิ้งสะเจิ้ง มันไปเปิงใด ต้องละหื้อได้ ลาภยศ

กำว่าครูบา ค่าจะบ่ลด หากบ่เคี้ยวคด ยะหื้อเหมาะสม

สืบเจ๋ตะนา อย่างน่าชื่นชม สองมือประณม กราบก้มด้วยใจ๋

กำว่าครูบา สูงค่ามอกใด ฮักษาเอาไว้ เต๊อะปี้น้องเฮา

Re: ฝึกเขียนค่าว (บทกวีล้านนา)..โดย น้ำฟ้า

โพสต์เมื่อ: อาทิตย์ 13 ธ.ค. 2015 11:46 am
โดย ภาษาสยาม
1560719_680113732040101_378947743_n.jpg
1560719_680113732040101_378947743_n.jpg (91.78 KiB) เปิดดู 7119 ครั้ง

ภาพ : ศูนย์วัฒนธรรมเจียงใหม่

....ลมหนาวมาแล้ว โอ้แก้วแก่นต๋า ลูกหลานจากลา ละอุ๊ยอยู่บ้าน
ลมเย็นวอยวอย เสียงจ๊อยขับขาน ฟังไปเมินนาน กึ๊ดเติงหาเจ้า
มาแอ่วหาอุ๊ย พ่องเต๊อะสูเขา ละอ่อนบ้านเฮา ฮากเหง้าเฮามี
อุ๊ยเฝ้ากองหา ถ้ามาเป๋นปี๋ ใจ๋ปอบ่าดี ตุ๊กเศร้าเจ้นล้ำ...

Re: ฝึกเขียนค่าว (บทกวีล้านนา)..โดย น้ำฟ้า

โพสต์เมื่อ: อังคาร 19 ม.ค. 2016 6:27 am
โดย Namfar
กึ๊ดเติงหาบ้าน <3 แด่คนไก๋

3762959834847.jpg
3762959834847.jpg (62.42 KiB) เปิดดู 6972 ครั้ง



ลมหนาวล้วงเลาะ เหมยเกาะยามเจ๊า เหมือนดังใจ๋เฮา หนาวเหน็บ
คนอยู่ไก๋บ้าน สะต๊านทรวงเจ็บ ทนเศร้าทนเก็บ ความหม่นหมอง
หน้าหนาวปี๋นี้ ตี้บ้านคงกอง หน้าเศร้าหน้าหมอง กึ๊ดเติงลูกหลาน
นึกถึงเฮือนเก่า อยู่กั๋นเมินนาน ตี้หั้นคือบ้าน ตี้ฮัก
ไปอยู่ตี้ไหน หัวใจพร้อมพรัก กึ๊ดเติงหาฮัก ป๋างหลัง
ยามเจ๊าไก่ขัน ปากั๋นลุงลัง เอาหลัวมาดัง นึ่งเข้า
ยามขวายมาหน้อย เหมยย้อยบางเบา ป๋ากั๋นกิ๋นเข้า พร้อมหน้า
ปี้น้องญาติสาย ป้าลุงอาวอา ป้ออุ๊ยแม่ป้า เป๋นหมุกเป๋นหมู่
ไผมีหยังกิ๋น ก่เอามาจู ผักป๋าจิ๊นหมู กิ๋นได้วันค่ำ
มากิ๋นกันหลาย ข้าวบ่ดายก่ลำ ฮอยยิ้มน้ำกำ ตึงจ๋ำไว้มั่น
กำสอนป้อแม่ อุ๊ยเฮาแบ่งปั๋น สำนึกตึงวัน บ่ผันจากไก๋
ถ้าถึงเวลา ขึ้นมาวันใด จะขอปิ๊กไป ขอต๋ายอยู่บ้าน
ผ่านวันเวลา ผ่านมาเมินนาน ลมหนาวผันผ่าน กี่ปี๋
ยังมักข้าวหลาม ถามหาข้าวจี่ กึ๊ดเติงเดือนยี่ ปี๋ใหม่บ้านเฮา
ถึงอยู่ตางเพ้ แสนจะเงียบเหงา ก๋ำลังใจ๋เจ้า อยู่เมืองล้านนา
รอคอยลูกกำ ป้อจ๋าแม่จ๋า รอถึงเวลา พร้อมหน้าอย่างเกย

#สมาคมคนเหนือ

Re: ฝึกเขียนค่าว (บทกวีล้านนา)..โดย น้ำฟ้า

โพสต์เมื่อ: พุธ 14 ส.ค. 2019 9:40 pm
โดย น้ำฝน ทะกลกิจ
“แม่”

141428.jpg
141428.jpg (53.24 KiB) เปิดดู 5582 ครั้ง


สองมือหยาบกร้าน ผ่านวันเวลา เลี้ยงดูลูกมา จ๋นใหญ่
แม่เฝ้าดูแล แม่บ่มนิสัย น้ำจิตน้ำใจ๋ ได้จากแม่มา
เลี้ยงประสาจ๋น สู้ทนศรัทธา แม่หลังสู้ฟ้า ใบหน้าสู้ดิน
หาเงินหาคำ เช้าค่ำชาชิน ตุ๊กยากบ่สิ้น ก๋ำลัง
สิ่งเดียวตี้ยึด แม่กึ๊ดแม่หวัง เป๋นฮ่มใบบัง ป้องลูกพ้นภัย
ลูกเจ็บลูกช้ำ น้ำต๋าแม่ไหล ลูกเจ็บมอกใด ใจ๋แม่เจ็บกว่า
ลูกใหญ่เป๋นคน มีหน้ามีต๋า คือสิ่งล้ำค่า ตี้แม่ใค่หัน
ลูกใหญ่แม่เฒ่า แก่ลงตึงวัน ก๋ำลังแม่นั้น ก้อยก้อยเสี้ยงไป
ขอเพียงแค่ลูก ผูกพันหัวใจ๋ ทรัพย์สินใดใด บ่าเต้าบ่เปียง
ถึงลูกบ่ดี อู้ซัดอู้เถียง แม่บ่เกยเสี้ยง แม่บ่เกยจัง
ความฮักยิ่งใหญ่ ตี้บ่คาดหวัง สูลืมหรือยัง แม่รออยู่บ้าน
สองมือเหี่ยวย่น รอกอดลูกหลาน บ่ดีรำคาญ ลืมหลง
เกิดมาเป๋นคน ต้องฮักเผ่าพงศ์ คุณธรรมสูงส่ง มั่นกตัญญู
ตอบแทนพระคุณ บุญแม่อุ้มชู ต้องกึ๊ดต้องฮู้ บ่หลงลืมไป
บุญแม่บ่มี จะไปหาไหน หาฮักอันใด มาชดมาเชย
ทำในวันนี้ บ่ดีนิ่งเฉย ยะเหมือนเปิ้นเกย ยะหื้อกับเฮา

~น้ำฟ้า~